غزل

تنزیلہ مہروی

اعصاب پہ چھایا ہوا اک آفتِ جاں ہے
شیریں ہے دہن جس کا سخن مشک فشاں ہے

ہر سمت یوں خوشبو کو لٹاتے ہوئے گزرے
جیسے کہ بدن اس کا گلابوں کی دکاں ہے

مانا کہ محبت کے قرینوں سے ہے انجان
پر یار ہے میرا، وہ مرا رُوحِ رواں ہے

مل جائے سرِ راہ ستمگر تو میں پوچھوں
وعدے وہ ہوئے کیا، جو محبت تھی کہاں ہے

میں نے تو نہیں دی تھی ہوا عشق اگن کو
اٹھا یہ مگر کیوں مرے پہلو سے دھواں ہے

کیوں چاک گریبان ہیں عشاق کے سینے
کیوں عشق کے میدان میں کربل کا سماں ہے

ہر شاخ پہ کھلتا بھی نہیں غنچہ ء الفت
ہر دل یہاں ہوتا نہیں فریاد کناں ہے

کم ظرف کے منہ لگنا نہیں مجھ کو گوارا
ہر چند الجھنے کو مرے منہ میں زباں ہے

ہوتا نہیں مہروؔ سے ادا قرضِ محبت
کندھوں پہ پڑا آ کے عجب بارِ گراں ہے

Scroll to Top